امریکا نے طویل فاصلے تک مار کرنیوالے میزائلوں کا پورا ذخیرہ استعمال کر لیا

برطانوی خبر ایجنسی رائٹرز کی ایک رپورٹ کے مطابق ایران جنگ میں امریکی فوج نے اپنے طویل فاصلے تک مار کرنے والے جدید ترین میزائلوں کے تمام ذخائر استعمال کر لیے ہیں، جن میں آرمی ٹیکٹیکل میزائل سسٹمز (ATACMS) اور پریسیژن اسٹرائیک میزائل شامل ہیں۔ رپورٹ میں انکشاف کیا گیا ہے کہ امریکا اپنے ٹوٹل ذخیرے کا تقریباً آدھا حصہ ٹوماہاک کروز میزائل بھی استعمال کر چکا ہے، جس پر بعض عسکری حکام نے صدر ڈونلڈ ٹرمپ کو دفاعی صلاحیتوں اور ذخائر میں کمی کے حوالے سے آگاہ کیا ہے۔ جنگ طویل ہونے کی صورت میں پینٹاگون کو آئندہ کی ملٹری اسٹریٹجی پر نظرِ ثانی کرنا پڑ سکتی ہے، جبکہ فی الوقت دنیا بھر میں قائم امریکی ملٹری بیسز سے ہتھیار منتقل کر کے اس کمی کو پورا کیا جا رہا ہے۔ دوسری جانب وائٹ ہاؤس نے ان اطلاعات کو سختی سے مسترد کرتے ہوئے دعویٰ کیا ہے کہ امریکا کے پاس دنیا کے کسی بھی ملک سے زیادہ دفاعی و عسکری اسلحہ موجود ہے۔