جنوبی کوریا میں شدید گرمی کی لہر، 16 افراد جان کی بازی ہار گئے

جنوبی کوریا میں ریکارڈ توڑ گرمی اور شدید ہیٹ ویو کا سلسلہ جاری ہے، جس کے باعث رواں سال ۱۵ مئی سے ۲ اگست کے دوران مختلف بیماریوں میں مبتلا ہونے والے افراد کی تعداد ۲ ہزار ۲۵ تک پہنچ گئی ہے جبکہ ۱۶ افراد جان کی بازی ہار چکے ہیں۔ جنوبی کوریا کی وزارتِ داخلہ کے مطابق شدید درجہ حرارت اور ہیٹ اسٹروک کے باعث ہلاک ہونے والوں کی تعداد میں مسلسل اضافہ ہو رہا ہے۔ مختلف شہروں بالخصوص سیول میں درجہ حرارت خطرناک حد تک بڑھنے پر حکام نے شدید گرمی کی ہنگامی الرٹ جاری کر دی ہے اور شہریوں کو بلاضرورت باہر نکلنے سے گریز کرنے، پانی کا زیادہ استعمال کرنے اور ٹھنڈے مقامات پر رہنے کی ہدایت کی ہے۔ انتظامیہ نے متاثرین کی سہولت کے لیے ہزاروں کولنگ سینٹرز بھی فعال کر دیے ہیں۔