ایرانی دھمکیوں کے باوجود آبنائے ہرمز کا جنوبی بحری راستہ بدستور کھلا ہے، سینٹ کام

امریکی سینٹرل کمانڈ (سینٹ کام) نے اپنے ایک بیان میں کہا ہے کہ ایرانی دھمکیوں اور کشیدگی کے باوجود آبنائے ہرمز کا جنوبی بحری راستہ تجارتی جہاز رانی کے لیے بدستور کھلا ہے اور بحری آمدورفت معمول کے مطابق جاری ہے۔ سوشل میڈیا پلیٹ فارم ایکس (X) پر جاری کردہ بیان میں سینٹ کام نے بتایا کہ گزشتہ تین ماہ کے دوران ایک ہزار سے زائد تجارتی جہاز اس اہم ترین بین الاقوامی آبی گزرگاہ سے بحفاظت گزر چکے ہیں۔ امریکی فوج کے مطابق، ایران کی جانب سے جارحانہ اقدامات کے خدشات کے پیشِ نظر تجارتی جہازوں کو ضروری سیکیورٹی اور معاونت فراہم کی جا رہی ہے تاکہ عالمی تجارت اور تیل کی ترسیل بلا تعطل جاری رہے۔ سینٹ کام نے واضح کیا کہ اس اہم عالمی توانائی گزرگاہ میں امن و امان کی بحالی اور جہاز رانی کی آزادی کی ضمانت کے لیے امریکی عسکری آپریشنز مسلسل جاری رہیں گے