پنجاب یونیورسٹی کے ایک شعبے کی عمارت میں پرائیویٹ مرغیاں پالنے کا انکشاف

پنجاب یونیورسٹی کے شعبہ الیکٹریکل انجینئرنگ کی سرکاری عمارت میں ڈائریکٹر کی جانب سے مبینہ طور پر پرائیویٹ مرغیاں پالنے کا انکشاف ہوا ہے۔ شعبے کے ڈائریکٹر نے ادارے کی چھت اور لان میں مرغیاں رکھ کر وہاں سرکاری خرچے پر دڑبے بنوا دیے ہیں، جبکہ مرغیوں کو محفوظ رکھنے کے لیے لان میں 5 لاکھ روپے کی لاگت سے جنگلہ بھی لگوایا گیا ہے، جس کے باعث طلبہ کا مرکزی لائبریری جانے کا راستہ بند ہو چکا ہے۔ چونکا دینے والی بات یہ ہے کہ ان پرائیویٹ مرغیوں کی دیکھ بھال کے لیے شعبے کے سرکاری ملازمین ڈیوٹی پر مامور ہیں اور شدید گرمی کے باعث مرغیوں کو کلاس رومز کے ہال میں شفٹ کر کے سرکاری کولر اور اے سی (AC) سے ان کی تواضع کی جا رہی ہے۔ یونیورسٹی ترجمان نے اس عمل کی اجازت دینے کی تردید کرتے ہوئے معاملے کی جانچ پڑتال کا یقین دلایا ہے، جبکہ دوسری جانب شعبے کے ڈائریکٹر نے اس اقدام کا دفاع کرتے ہوئے مؤقف اختیار کیا ہے کہ یہ مرغیاں طالبات کو ‘قدرتی ماحول’ فراہم کرنے کے لیے رکھی گئی ہیں اور وہ مستقبل میں یہاں مزید پرندے بھی لائیں گے