ایرانی حملوں کی ویڈیوز شیئر کرنا مہنگا پڑگیا، امارات میں 70 برطانوی شہری گرفتار

ابوظہبی: متحدہ عرب امارات میں حکام نے ایران کے ڈرون اور میزائل حملوں سے ہونے والے نقصانات کی ویڈیوز اور تصاویر شیئر کرنے کے الزام میں برطانیہ کے 70 شہریوں کو گرفتار کر لیا ہے۔

برطانوی میڈیا رپورٹس کے مطابق گرفتار افراد میں سیاح، امارات میں مقیم برطانوی شہری اور فضائی عملے کے ارکان بھی شامل ہیں۔ بعض افراد کو ضمانت پر رہا کر دیا گیا ہے، تاہم ان کے پاسپورٹ ضبط کر لیے گئے ہیں تاکہ وہ ملک سے باہر نہ جا سکیں۔

رپورٹس کے مطابق اماراتی قوانین کے تحت حساس نوعیت کی تصاویر یا ویڈیوز شیئر کرنا ہی نہیں بلکہ بعض صورتوں میں انہیں وصول کرنا بھی جرم شمار ہوتا ہے۔ ایسے جرائم پر 10 سال تک قید اور 2 لاکھ درہم تک جرمانہ ہو سکتا ہے۔

حکام کا کہنا ہے کہ یہ اقدامات قومی سلامتی اور حساس معلومات کے تحفظ کے لیے کیے گئے ہیں، خاص طور پر ایسے وقت میں جب خطے میں ایران کے ساتھ کشیدگی میں اضافہ دیکھا جا رہا ہے۔

برطانوی ذرائع کے مطابق تنازع سے قبل بڑی تعداد میں برطانوی شہری دبئی میں مقیم تھے، تاہم کشیدگی کے بعد ان میں سے کئی واپس اپنے ملک جا چکے ہیں۔

ماہرین کا کہنا ہے کہ یہ گرفتاریاں ظاہر کرتی ہیں کہ خلیجی ممالک جنگی حالات میں سیکیورٹی قوانین پر سختی سے عمل درآمد کر رہے ہیں اور سوشل میڈیا پر مواد کی شیئرنگ کے حوالے سے سخت پالیسی اختیار کی گئی ہے۔