پاکستان کے ساتھ مل کر سعودی عسکری ضروریات کا جائزہ لیں گے: ترک وزیر خارجہ

ترک وزیر خارجہ حقان فیدان نے اعلان کیا ہے کہ یمنی حوثی ملیشیا کے مسلسل حملوں کی وجہ سے پیدا ہونے والی نئی صورتحال کے پیشِ نظر سعودی عرب کی کچھ عسکری ضروریات سامنے آ سکتی ہیں، جن کا جائزہ ترکیہ اور پاکستان باہمی اشتراک اور مکہ معاہدے (مکہ ڈیفنس الائنس) کے تحت لیں گے۔ مشرقِ وسطیٰ کی کشیدہ صورتحال پر اپنے اہم بیان میں ترک وزیرِ خارجہ نے کہا کہ خطے میں پائیدار امن کے لیے جنگ کے خاتمے سے متعلق تمام تجاویز متعلقہ فریقین کو ارسال کی جا چکی ہیں، جبکہ سعودی عرب پر حوثیوں کی جانب سے حملوں کا سلسلہ جاری ہے۔

حقان فیدان نے واضح کیا کہ سعودی عرب کو امریکا ایران جنگ میں گھسیٹنا یا اس کا حصہ بنانا بالکل ناقابلِ قبول ہوگا۔ انہوں نے تنبیہ کی کہ مشرقِ وسطیٰ میں جاری یہ بحران اب معاشی طور پر خطے اور دنیا کے لیے ناقابلِ برداشت حد تک پہنچ چکا ہے، جس کے اثرات ہر جگہ محسوس کیے جا رہے ہیں۔ ترک وزیرِ خارجہ نے مزید بتایا کہ خطے کے ساتھ ساتھ بحیرہ اسود میں امن کے لیے ترکیہ نے یوکرین اور روس کو بھی لڑائی کے خاتمے کی باضابطہ پیشکش ارسال کر دی ہے تاکہ عالمی سطح پر جاری تنازعات کو سفارتی ذرائع سے حل کیا جا سکے۔