محسن نقوی کا دورہ تہران صرف دو طرفہ تعلقات پر مرکوز ہوگا، ایرانی وزارت خارجہ

ایرانی وزارتِ خارجہ کے ترجمان اسماعیل بقائی نے واضح کیا ہے کہ پاکستانی وزیرِ داخلہ محسن نقوی کا عنقریب ہونے والا دورۂ تہران صرف دوطرفہ تعلقات اور باہمی تعاون کے فروغ پر مرکوز ہوگا۔ اپنے ایک اہم بیان میں ترجمان نے ان قیاس آرائیوں کو رد کرتے ہوئے کہا کہ وہ اس دورے کے دوران جاری جنگ یا تنازع کے خاتمے کے سلسلے میں کسی مخصوص امریکی پیغام کے تبادلے سے آگاه نہیں ہیں، اور نہ ہی یہ دورہ کسی خاص ثالثی کا حصہ ہے۔

اسماعیل بقائی نے پاکستان کے ساتھ تعلقات کی تعریف کرتے ہوئے کہا کہ دونوں ہمسایہ ممالک کے درمیان انتہائی دوستانہ اور مضبوط تعلقات قائم ہیں جن میں بالخصوص گزشتہ چند ماہ کے دوران تمام شعبوں میں مسلسل بہتری اور استحکام آیا ہے۔ ترجمان ایرانی وزارتِ خارجہ کا مزید کہنا تھا کہ ایران کی ‘اچھی ہمسائیگی’ کی پالیسی کے تحت تہران اپنے تمام دیرینہ تاریخی، ثقافتی اور مشترکہ رشتوں کو بروئے کار لاتے ہوئے اسلام آباد کے ساتھ باہمی روابط کو زیادہ سے زیادہ مضبوط بنانے کے لیے پرعزم ہے۔