ایران نے قطری ثالث کے ذریعے مذاکرات کی 7 شرائط امریکا تک پہنچا دیں، محسن رضائی

ایران کی قومی سلامتی کونسل کے سیکرٹری محسن رضائی نے انکشاف کیا ہے کہ تہران نے قطر کی ثالثی کے ذریعے امریکا کے ساتھ سفارتی مذاکرات دوبارہ شروع کرنے کے لیے 7 بنیادی شرائط پیش کر دی ہیں اور اب امریکی صدر ڈونلڈ ٹرمپ کے باضابطہ جواب کا انتظار کیا جا رہا ہے۔ عالمی خبر رساں ادارے ‘الجزیرہ’ سے گفتگو کرتے ہوئے محسن رضائی نے بتایا کہ ایران نے کسی بھی پائیدار معاہدے تک پہنچنے کے لیے تمام محاذوں پر جنگ کے فوری خاتمے، امریکا کی جانب سے منجمد کیے گئے ایرانی اثاثوں کی مکمل بحالی اور بحری ناکہ بندی ختم کرنے کے مطالبات سامنے رکھے ہیں۔

سیکرٹری قومی سلامتی کونسل کا کہنا تھا کہ ایران قطری ثالث کے ساتھ مسلسل اور براہِ راست رابطے میں ہے، جس نے تہران کے تمام اہم مطالبات واشنگٹن تک پہنچا دیے ہیں۔ انہوں نے وضاحت کی کہ ایران اور امریکا کے درمیان جاری سخت کشیدگی اور معرکے کے باوجود پسِ پردہ بالواسطہ سفارت کاری اور رابطوں کا سلسلہ کبھی نہیں ٹوٹا۔ یہ سفارتی رابطے جون میں پاکستان کی میزبانی میں طے پانے والی ‘اسلام آباد مفاہمتی یادداشت’ کے خاتمے کے بعد بھی مسلسل جاری رہے ہیں، تاکہ خطے میں جنگ کو روک کر کسی وسیع تر اور جامع معاہدے کی راہ ہموار کی جا سکے۔