تہران نے سبق نہ سیکھا تو اسلامی جمہوریہ ایران کا وجود باقی نہیں رہے گا، ٹرمپ کی دھمکی

امریکی صدر ڈونلڈ ٹرمپ نے ایران کے خلاف سخت ترین موقف اختیار کرتے ہوئے دھمکی دی ہے کہ اگر ایرانی حکام نے سبق نہ سیکھا تو مستقبل میں “اسلامی جمہوریہ ایران کا وجود باقی نہیں رہے گا”۔ امریکی صدر کا یہ بیان دونوں ممالک کے درمیان جاری شدید کشیدگی کو ایک نئے اور انتہائی خطرناک موڑ پر لے آیا ہے۔

اپنے سوشل میڈیا پلیٹ فارم ‘ٹروتھ سوشل’ (Truth Social) پر جاری ایک پیغام میں صدر ڈونلڈ ٹرمپ نے ایران کے اندر امریکی فوج کی جانب سے کیے جانے والے تازہ حملوں کی تصدیق کی ہے۔ انہوں نے بتایا کہ امریکی فضائیہ نے ایران میں میزائل اور ڈرون ذخیرہ کرنے والی تنصیبات سمیت ساحلی ریڈار سائٹس کو کامیابی سے نشانہ بنایا ہے۔ امریکی صدر نے ان فوجی حملوں کا دفاع کرتے ہوئے کہا کہ یہ کارروائی ایران کی جانب سے جنگ بندی معاہدے کی مسلسل خلاف ورزیوں کا جواب ہے۔ انہوں نے سخت برہمی کا اظہار کرتے ہوئے لکھا: “ایرانی حکام نے جنگ بندی معاہدے کی دوبارہ خلاف ورزی کی ہے، یہ ممکن ہے کہ وہ کبھی (سبق) نہیں سیکھیں گے۔”

صدر ٹرمپ نے اپنے بیان میں تہران کو انتباہ جاری کرتے ہوئے کہا کہ امریکہ مستقبل میں اس سے بھی بڑی کارروائی کر سکتا ہے۔ ان کا کہنا تھا: “ایسا وقت بھی آ سکتا ہے جب ہم مزید تحمل کا مظاہرہ نہیں کر پائیں گے، اور ہمیں وہ کام فوری طور پر مکمل کرنا پڑے گا جس کا ہم نے بہت کامیابی سے آغاز کیا ہے۔” انہوں نے خبردار کیا کہ اگر امریکہ کو یہ انتہائی قدم اٹھانا پڑا تو پھر ایران کا وجود ہی ختم ہو جائے گا۔ سفارتی ماہرین کے مطابق صدر ٹرمپ کے اس جارحانہ بیان اور حالیہ حملوں کے بعد عمان اور سوئٹزرلینڈ کے ذریعے ہونے والی سفارتی کوششیں اور دونوں ممالک کے درمیان طے پانے والی مفاہمتی یادداشت اب مکمل طور پر تباہ ہونے کے دہانے پر پہنچ گئی ہے، جس سے پورے مشرقِ وسطیٰ میں ایک وسیع تر جنگ کا خطرہ حقیقی شکل اختیار کر گیا ہے۔