ٹرمپ نے ایران کی افزودہ یورینیم روس منتقل کرنے کی پیوٹن کی پیشکش مسترد کر دی

امریکی صدر ڈونلڈ ٹرمپ اور روسی صدر ولادیمیر پیوٹن کے درمیان ہونے والے حالیہ رابطے میں ایران کے جوہری پروگرام اور جاری کشیدگی کے خاتمے کے حوالے سے ایک اہم پیش رفت سامنے آئی ہے۔ امریکی میڈیا کے مطابق روسی صدر نے ایران کے پاس موجود 60 فیصد افزودہ یورینیم کو روس منتقل کرنے کی تجویز پیش کی تھی تاکہ خطے میں جاری جنگ اور تنازع کا سفارتی حل نکالا جا سکے، تاہم صدر ٹرمپ نے اس پیشکش کو قبول کرنے سے انکار کر دیا ہے۔

رپورٹ کے مطابق یہ پیشکش رواں ہفتے ایک ٹیلی فونک گفتگو کے دوران کی گئی تھی، جسے روسی صدر نے تہران کے خلاف جنگ کے خاتمے کے لیے ایک ممکنہ معاہدے کے طور پر پیش کیا تھا۔ صدر ٹرمپ کی جانب سے اس انکار کو تہران پر “میکسیمم پریشر” (انتہائی دباؤ) کی پالیسی کے تسلسل کے طور پر دیکھا جا رہا ہے، جس کا مقصد ایران کو مزید سخت شرائط پر مذاکرات کی میز پر لانا ہے۔ سفارتی ماہرین کا خیال ہے کہ اس پیشکش کی مستردگی کے بعد خطے میں کشیدگی کم کرنے کی کوششوں کو دھچکا لگ سکتا ہے۔