امریکا سے مذاکرات میں اب بھی بڑا فاصلہ موجود ہے، ایرانی اسپیکر

تہران: ایرانی پارلیمنٹ کے اسپیکر اور مذاکراتی وفد کے سربراہ ڈاکٹر محمد باقر قالیباف نے کہا ہے کہ امریکا کے ساتھ جاری مذاکرات میں اگرچہ کچھ پیش رفت ہوئی ہے لیکن دونوں فریقوں کے درمیان اب بھی نمایاں فاصلہ موجود ہے۔

ایک انٹرویو میں انہوں نے کہا کہ امریکا کی جانب سے بعض اقدامات، خصوصاً ناکہ بندی کے اعلان کو وہ غیر منطقی اور ناقابل قبول قرار دیتے ہیں۔ ان کے مطابق بعض طاقتیں آبنائے ہرمز سے آزادانہ گزرنے کی بات کرتی ہیں مگر ایران کے لیے رکاوٹیں پیدا کی جاتی ہیں جو دوہرا معیار ہے۔

ڈاکٹر باقر قالیباف نے بتایا کہ ایران نے حالیہ کشیدگی کے دوران متعدد دفاعی اہداف کو نشانہ بنایا، جن میں دشمن کے ڈرونز اور ایک جدید جنگی طیارہ بھی شامل ہے۔ ان کے مطابق یہ کارروائیاں ایران کی دفاعی صلاحیت کا واضح اظہار ہیں۔

انہوں نے مزید کہا کہ ایران اپنی عسکری حکمت عملی کی تفصیلات عام نہیں کرتا، تاہم مخالف فریق اس پیغام کو اچھی طرح سمجھ چکا ہے۔

ایرانی اسپیکر نے واضح کیا کہ آبنائے ہرمز کے معاملے پر کسی بھی قسم کی پیش رفت ایران کی اجازت اور سیکیورٹی پالیسی کے مطابق ہی ممکن ہے۔