ایران امریکا مذاکرات آئندہ ہفتے اسلام آباد میں متوقع ہیں: عرب میڈیا

اسلام آباد: عرب ذرائع ابلاغ نے دعویٰ کیا ہے کہ ایران اور امریکا کے درمیان مذاکرات آئندہ ہفتے اسلام آباد میں ہونے کا امکان ہے، جس کے پیش نظر وفاقی دارالحکومت میں غیر معمولی سکیورٹی انتظامات کیے جا رہے ہیں۔

عرب نشریاتی ادارے الجزیرہ نے دو پاکستانی سکیورٹی ذرائع کے حوالے سے رپورٹ کیا ہے کہ مذاکرات کا دوسرا مرحلہ جمعہ سے قبل متوقع ہے، اور اس حوالے سے کیے گئے اندازے مختلف سکیورٹی و سفارتی عوامل پر مبنی ہیں۔

رپورٹ کے مطابق امریکا کے دو لاجسٹک طیارے نور خان ائیر بیس پر اتر چکے ہیں جبکہ ائیرپورٹ سے ریڈ زون تک جانے والی اہم شاہراہوں کو عارضی طور پر بند کر دیا گیا ہے، جو ممکنہ اعلیٰ سطحی سرگرمیوں کی نشاندہی کرتا ہے۔

ذرائع کا کہنا ہے کہ اسلام آباد کے متعدد ہوٹلز کو خالی کروایا جا رہا ہے اور جمعہ تک نئی بکنگ پر پابندی عائد کر دی گئی ہے۔

اسی دوران راولپنڈی اور اسلام آباد میں پبلک ٹرانسپورٹ اور بھاری ٹریفک کو تاحکم ثانی معطل کر دیا گیا ہے، جبکہ میٹرو بس سروس بھی پمز اسٹیشن سے پاک سیکرٹریٹ تک بند کر دی گئی ہے۔