اسلام آباد میں ایران امریکہ مذاکرات، میریٹ ہوٹل سرکاری تحویل میں، شہر میں سخت بندشیں

اسلام آباد: وفاقی دارالحکومت میں ایران اور امریکا کے درمیان متوقع مذاکرات کے دوسرے دور کے پیش نظر سکیورٹی اقدامات انتہائی سخت کر دیے گئے ہیں، جبکہ اسلام آباد کے معروف میریٹ ہوٹل کو فوری طور پر سرکاری تحویل میں لینے کا فیصلہ کیا گیا ہے۔

ہوٹل انتظامیہ کے مطابق ہوٹل میں موجود تمام مہمانوں کو آج دن تین بجے تک عمارت خالی کرنے کی ہدایت جاری کر دی گئی ہے، جبکہ انہیں متبادل رہائش فراہم کرنے کی پیشکش بھی کی گئی ہے۔ انتظامیہ نے مراسلہ جاری کرتے ہوئے تصدیق کی ہے کہ تین بجے کے بعد ہوٹل مکمل طور پر سرکاری تحویل میں ہوگا۔

ذرائع کے مطابق اسلام آباد میں غیر ملکی وفود کی آمد متوقع ہے، جس کے باعث ریڈ زون اور توسیعی ریڈ زون کو ہر قسم کی ٹریفک کے لیے مکمل طور پر بند کر دیا گیا ہے۔

ٹریفک پولیس کے مطابق کورال سے زیرو پوائنٹ تک ایکسپریس وے بند رہے گا جبکہ سری نگر ہائی وے پر بھی مختلف اوقات میں ٹریفک کو روکا جا سکتا ہے۔ شہر میں کسی بھی جانب سے آنے والی بھاری ٹریفک کے داخلے پر مکمل پابندی عائد کر دی گئی ہے۔

شہریوں کو ہدایت کی گئی ہے کہ وہ غیر ضروری سفر سے گریز کریں اور متبادل ٹریفک پلان پر عمل کریں۔ جی 5، جی 6، جی 7، ایف 6 اور ایف 7 کے رہائشی راولپنڈی آمدورفت کے لیے مارگلہ روڈ سے نویں ایونیو استعمال کریں۔

مزید بتایا گیا ہے کہ جناح ایونیو خیبر پلازہ سے داخلہ بند کر دیا گیا ہے جبکہ کلب روڈ کشمیر چوک سے بھی بند کر دی گئی ہے۔

دوسری جانب جڑواں شہروں میں چلنے والی میٹرو بس سروس کو مکمل طور پر معطل کر دیا گیا ہے، اور حکام کے مطابق یہ سروس تاحکم ثانی بند رہے گی۔