واشنگٹن:ایران صورتحال پر اہم اجلاس، صدر ٹرمپ کی فیلڈ مارشل عاصم منیر سے فون پر گفتگو

واشنگٹن: ایران کی صورتحال کے حوالے سے امریکی صدر ڈونلڈ ٹرمپ کی زیر صدارت سچویشن روم میں ایک اہم اجلاس منعقد ہوا جس میں خطے کی تازہ کشیدہ صورتحال، آبنائے ہرمز اور ایران سے جاری مذاکراتی عمل پر تفصیلی غور کیا گیا۔

اجلاس میں امریکی نائب صدر جے ڈی وینس، وزیر خارجہ مارکو روبیو، وزیر جنگ پیٹر ہیگستھ، وزیر خزانہ اسکاٹ بیسنٹ اور وائٹ ہاؤس کی چیف آف اسٹاف سوزی وائلز سمیت اعلیٰ حکام شریک تھے۔ اس کے علاوہ امریکی صدر کے نمائندے اسٹیو وٹکوف، سی آئی اے کے ڈائریکٹر جان ریٹکلف اور جوائنٹ چیفس کے چیئرمین ڈین کین بھی اجلاس میں موجود تھے۔

رپورٹس کے مطابق اجلاس کے دوران صدر ڈونلڈ ٹرمپ نے کم از کم ایک مرتبہ فیلڈ مارشل سید عاصم منیر اور ایرانی حکام سے ٹیلیفونک رابطہ کیا۔ گفتگو میں موجودہ صورتحال اور ممکنہ سفارتی پیش رفت پر تبادلہ خیال کیا گیا۔

ذرائع کے مطابق اجلاس میں اس امر پر بھی غور کیا گیا کہ آبنائے ہرمز میں پیدا ہونے والی صورتحال عالمی توانائی ترسیل پر کس طرح اثر انداز ہو سکتی ہے۔

یہ اجلاس ایسے وقت میں ہوا ہے جب ایران اور امریکا کے درمیان عارضی جنگ بندی کی مدت ختم ہونے کے قریب ہے۔ صدر ٹرمپ پہلے ہی عندیہ دے چکے ہیں کہ جلد کسی معاہدے کی توقع ہے تاہم مذاکرات کا نیا شیڈول ابھی طے نہیں ہوا۔

امریکی حکام کے مطابق اگر مذاکرات میں پیش رفت نہ ہوئی تو آئندہ چند دنوں میں صورتحال دوبارہ کشیدہ ہو سکتی ہے۔ وائٹ ہاؤس کی جانب سے اجلاس پر باضابطہ بیان جاری نہیں کیا گیا۔