اسلام آباد اور راولپنڈی میں سکیورٹی سخت، میٹرو بس اور ٹرانسپورٹ بند

اسلام آباد: جڑواں شہروں اسلام آباد اور راولپنڈی میں سکیورٹی خدشات کے پیش نظر ہائی الرٹ نافذ کر دیا گیا ہے، جس کے تحت میٹرو بس سروس سمیت تمام پرائیویٹ، پبلک اور گڈز ٹرانسپورٹ کو تاحکم ثانی معطل کر دیا گیا ہے۔

حکام کے مطابق میٹرو بس سروس پمز اسٹیشن سے پاک سیکرٹریٹ تک مکمل بند کر دی گئی ہے جبکہ صدر اسٹیشن سے کچہری تک محدود پیمانے پر چلائی جا رہی ہے۔

راولپنڈی میں سکیورٹی کے پیش نظر پولیس کی اضافی نفری تعینات کر دی گئی ہے اور اہم مقامات پر ناکہ بندی سخت کر دی گئی ہے۔ مری روڈ، ایکسپریس وے اور فیض آباد کے اطراف میں اضافی چیک پوسٹیں قائم کی گئی ہیں جبکہ فیض آباد، پیر ودھائی اور چھبیس نمبر کے بس اڈے بند کر دیے گئے ہیں۔ تجارتی مراکز بھی بند رکھنے کا فیصلہ کیا گیا ہے۔

ٹریفک پولیس نے شہریوں کو متبادل راستوں کے حوالے سے آگاہ کرتے ہوئے بتایا ہے کہ ریڈ زون اور اس کے اطراف کے علاقے مکمل طور پر بند رہیں گے۔ کورال سے زیرو پوائنٹ تک ایکسپریس وے بند ہوگا جبکہ سری نگر ہائی وے پر بھی وقفے وقفے سے ٹریفک کو روکا جا سکتا ہے۔

پولیس کے مطابق اسلام آباد میں کسی بھی شاہراہ سے آنے والی بھاری ٹریفک کے داخلے پر مکمل پابندی عائد کر دی گئی ہے۔ شہریوں اور ٹرانسپورٹرز کو ہدایت کی گئی ہے کہ وہ ان دنوں میں دارالحکومت کا رخ کرنے سے گریز کریں اور متبادل راستوں کا استعمال کریں۔