خلیج میں لنگرانداز جہاز  حرکت نہ کریں ، پاسداران انقلاب کی سخت وارننگ

ایرانی پاسداران انقلاب کی بحریہ نے خلیج میں لنگر انداز تمام بحری جہازوں کو اپنی جگہ برقرار رکھنے کا حکم جاری کردیا ہے۔ ایرانی ذرائع ابلاغ کے مطابق بحریہ کا کہنا ہے کہ آبنائے ہرمز کے قریب کسی بھی قسم کی نقل و حرکت کو دشمن کے ساتھ تعاون تصور کیا جائے گا۔

پاسداران انقلاب کی نیوی نے اپنے بیان میں واضح کیا کہ تمام بحری جہاز اور ان کے مالکان جاری کردہ ہدایات پر مکمل عمل کریں، بصورت دیگر سنگین نتائج کا سامنا کرنا پڑ سکتا ہے۔ بیان میں امریکی صدر کے آبنائے ہرمز سے متعلق بیانات کو بے حیثیت قرار دیتے ہوئے مسترد کیا گیا۔

مزید کہا گیا ہے کہ اگر کسی جہاز نے وارننگ کو نظر انداز کیا تو اسے نشانہ بنایا جا سکتا ہے۔ پاسداران انقلاب نے یہ بھی خبردار کیا کہ اگر امریکی بحریہ نے ایرانی جہازوں پر حملے کی کوشش کی تو اسے سخت ردعمل کا سامنا کرنا پڑے گا۔

بیان میں مزید کہا گیا کہ آبنائے ہرمز ہفتہ کی دوپہر سے امریکی ناکہ بندی کے خاتمے تک بند رہے گی۔ دوسری جانب ایرانی اعلیٰ قیادت کا کہنا ہے کہ بحریہ دشمن کو مزید نقصان پہنچانے کے لیے مکمل طور پر تیار ہے۔