سعودی ایئرلائنز کی پشاور پروازیں بحال، جدہ سے پہلی پرواز پہنچ گئی

پشاور: سعودی ایئرلائنز  نے باچا خان انٹرنیشنل ایئرپورٹ پشاور کے لیے اپنا فلائٹ آپریشن دوبارہ بحال کر دیا ہے، جس کے بعد جدہ سے آنے والی پہلی پرواز پشاور پہنچ گئی۔

فضائی حکام کے مطابق جدہ سے آنے والی پرواز ایس وی 796 صبح 9 بج کر 39 منٹ پر باچا خان انٹرنیشنل ایئرپورٹ پر اتری، جس کے بعد مسافروں اور عملے میں خوشی کی لہر دوڑ گئی۔

یاد رہے کہ سعودی فضائی کمپنی نے 28 فروری 2026 کو پشاور کے لیے اپنی پروازیں عارضی طور پر معطل کر دی تھیں۔

پاکستان ایئرپورٹس اتھارٹی نے فلائٹ آپریشن کی بحالی کی تصدیق کرتے ہوئے کہا ہے کہ اب پشاور سے سعودی عرب کے لیے پروازیں معمول کے مطابق جاری رہیں گی۔

ذرائع کے مطابق پشاور سے سعودی عرب جانے والی واپسی پرواز بھی مسافروں کو لے کر روانہ ہوگی۔