پاکستان کے ذریعے مذاکرات میں پیشرفت، ایرانی تیل پر قبضہ کرنا چاہتا ہوں: امریکی صدر

امریکی صدر ڈونلڈ ٹرمپ نے ایران کے ساتھ جاری کشیدگی کے درمیان ایک اہم موڑ پر انکشاف کیا ہے کہ پاکستان کے تعاون سے تہران کے ساتھ مذاکرات میں مثبت پیش رفت ہو رہی ہے۔ اپنے طیارے میں صحافیوں سے گفتگو کرتے ہوئے صدر ٹرمپ نے کہا کہ ایران کے ساتھ بہت جلد ایک بڑا معاہدہ (Deal) طے پا سکتا ہے، جس کے لیے براہِ راست اور بالواسطہ رابطے جاری ہیں۔ انہوں نے اس سلسلے میں پاکستان کے کردار کی تعریف کرتے ہوئے کہا کہ ایران نے خیر سگالی کے طور پر پاکستان کے 20 بحری جہازوں کو آبنائے ہرمز سے گزرنے کی اجازت دی ہے۔

دوسری جانب، صدر ٹرمپ نے ایران کے خلاف سخت ترین آپشنز کا ذکر کرتے ہوئے کہا کہ ان کا پسندیدہ انتخاب ایرانی تیل پر قبضہ کرنا ہے۔ انہوں نے ‘فنانشل ٹائمز’ کو انٹرویو دیتے ہوئے کہا کہ امریکہ ایران کے برآمدی مرکز ‘جزیرہ خارگ’ پر قبضہ کر سکتا ہے کیونکہ ایرانیوں کے پاس اب کوئی موثر دفاع باقی نہیں رہا۔ ٹرمپ کے مطابق امریکہ اب تک ایران میں 13 ہزار اہداف کو نشانہ بنا چکا ہے اور مزید 3 ہزار اہداف باقی ہیں۔

صدر ٹرمپ نے تہران میں ‘رجیم چینج’ (حکومت کی تبدیلی) کا دعویٰ کرتے ہوئے کہا کہ پہلی اور دوسری حکومتیں مکمل طور پر ختم ہو چکی ہیں اور اب جس تیسرے گروہ سے وہ مذاکرات کر رہے ہیں، وہ پہلے سے بالکل مختلف اور “معقول” ہے۔ انہوں نے ان امریکی سیاستدانوں کو “بیوقوف” قرار دیا جو ایرانی تیل پر قبضے کی مخالفت کر رہے ہیں۔ ٹرمپ کا کہنا تھا کہ موجودہ صورتحال میں ایران کی قیادت عملی طور پر بدل چکی ہے اور وہ جلد ایک نئی ڈیل کے لیے تیار ہو جائیں گے۔