ایران کا برکس ممالک سے ایرانی خودمختاری کی خلاف ورزی کی مذمت کا مطالبہ

ایرانی عدلیہ کے سربراہ غلام حسین محسنی نے برکس (BRICS) کے رکن ممالک سے اپیل کی ہے کہ وہ ایران کی خودمختاری کی خلاف ورزی کی شدید مذمت کریں۔ اپنے ایک بیان میں انہوں نے امریکہ اور اسرائیل کی عسکری کارروائیوں کو کھلم کھلا جنگی جرائم اور بین الاقوامی قوانین کی خلاف ورزی قرار دیا۔ انہوں نے انکشاف کیا کہ ان حملوں میں ہسپتالوں، تعلیمی و ثقافتی مراکز اور رہائشی علاقوں کو نشانہ بنایا گیا جس کے نتیجے میں خواتین اور بچوں سمیت بڑی تعداد میں عام شہری جاں بحق ہوئے۔ ایرانی عدلیہ کے سربراہ نے برکس ممالک کو خبردار کرتے ہوئے کہا کہ آج اگر ایران کی خودمختاری کی خلاف ورزی پر خاموشی اختیار کی گئی تو کل کوئی بھی برکس رکن ملک اس کا نشانہ بن سکتا ہے۔ انہوں نے عالمی دائرہ اختیار (Universal Jurisdiction) کے اصول کے تحت جنگی جرائم میں ملوث ذمہ داروں کے خلاف سخت قانونی کارروائی کا بھی مطالبہ کیا