خلیج میں امریکی فوجی اڈے برقرار رکھنا قابلِ عمل نہیں رہا: جنرل ڈیوڈ پیٹریاس

واشنگٹن: امریکہ کی سینٹرل انٹیلی جنس ایجنسی (سی آئی اے) کے سابق ڈائریکٹر اور ریٹائرڈ جنرل ڈیوڈ پیٹریاس نے اعتراف کیا ہے کہ مشرقی خلیجی ریاستوں میں قائم امریکی فوجی اڈوں کو طویل مدتی بنیادوں پر برقرار رکھنا اب پہلے کی طرح ممکن اور قابلِ عمل نہیں رہا۔

’گلوبل گیمبٹ‘ کو دیے گئے ایک انٹرویو میں عراق اور افغانستان میں اتحادی افواج کے سابق کمانڈر ڈیوڈ پیٹریاس نے کہا کہ ایران کی جانب سے خلیجی ممالک میں موجود امریکی تنصیبات پر حملوں کے بعد یہ فوجی اڈے باہمی دباؤ کا ذریعہ بن چکے ہیں۔ انہوں نے خلیج میں امریکی فضائی دفاعی صلاحیت پر تشویش کا اظہار کرتے ہوئے انکشاف کیا کہ امریکہ ممکنہ طور پر اپنے نصف کے قریب انتہائی مہنگے میزائل انٹرسیپٹرز استعمال کر چکا ہے۔ انہوں نے کہا کہ 50 ہزار ڈالر مالیت کے ایک معمولی ڈرون کو گرانے کے لیے لاکھوں ڈالر کا میزائل داغنا طویل مدتی جنگی حکمت عملی کے لحاظ سے معاشی طور پر ممکن نہیں ہے۔

جنرل پیٹریاس نے تاکید کی کہ امریکہ کو یوکرین کی جدید جنگی حکمت عملی سے سبق سیکھنا چاہیے، جہاں روزانہ ہزاروں کم قیمت ڈرونز کا استعمال کر کے توانائی اور دفاعی انفراسٹرکچر کو کامیابی سے نشانہ بنایا جا رہا ہے۔ واضح رہے کہ حالیہ مہینوں میں ایران کی جانب سے قطر میں العدید ایئر بیس (جو خطے میں سب سے بڑا امریکی اڈہ ہے)، کویت کی علی السالم، بحرین میں ففتھ فلیٹ اور متحدہ عرب امارات کی الظفرہ ایئر بیس سمیت متعدد امریکی تنصیبات کو نشانہ بنائے جانے کا دعویٰ کیا گیا ہے۔