روس اور یوکرین کے درمیان فضائی حملوں میں مختصر وقفے پر اتفاق

ماسکو: روس اور یوکرین کے درمیان جاری جنگ کے خاتمے کے لیے سفارتی کوششوں میں بڑی پیش رفت سامنے آئی ہے، جہاں روسی صدر ولادیمیر پیوٹن نے یوکرین کے خلاف تمام فضائی حملے تین روز کے لیے معطل کرنے کا حکم دے دیا ہے۔

روسی صدارتی دفتر (کریملن) کے مطابق یہ اہم اتفاق رائے امریکی صدر ڈونلڈ ٹرمپ کے خصوصی ایلچی اسٹیو وٹکوف اور جیرڈ کشنر کی کریملن میں صدر ولادیمیر پیوٹن سے ہونے والی تفصیلی ملاقات کے دوران ہوا۔ امریکی ایلچیوں اور روسی صدر کے درمیان تقریباً تین گھنٹے طویل نشست ہوئی، جس میں روس یوکرین جنگ کے مستقل خاتمے اور آئندہ کے روڈ میپ پر جامع تبادلہ خیال کیا گیا۔ کریملن کے ترجمان نے مذاکرات کو تعمیری اور مثبت قرار دیتے ہوئے بتایا کہ ملاقات کے دوران ممکنہ امن و جنگ بندی کے لیے متعدد تجاویز مرتب کی گئی ہیں۔

کریملن کے مطابق امریکی وفد نے صدر پیوٹن کے موقف سے یوکرینی حکام کو آعاہ کرنے کی یقین دہانی کرائی ہے۔ امریکی میڈیا کے مطابق دونوں امریکی ایلچی آج یوکرین کا دورہ کریں گے جہاں وہ صدر پیوٹن کا موقف اور امن تجاویز یوکرینی قیادت کے سامنے رکھیں گے۔ سفارتی ماہرین کے مطابق تین روزہ فضائی وقفہ دونوں ممالک کے درمیان مستقل امن معاہدے اور باضابطہ مذاکرات کی راہ ہموار کرنے میں اہم سنگِ میل ثابت ہو سکتا ہے۔