پاک بحریہ کی دفاعی صلاحیتوں کا سفر، آپریشن دوارکا سے معرکۂ حق تک

اسلام آباد: پاکستان کی دفاعی تاریخ اور خودمختاری کے تحفظ میں 6 ستمبر کا دن محض ایک تقریب نہیں بلکہ سرحدوں، فضاؤں اور سمندری حدود کے تحفظ کے لازوال عزم اور قومی جذبے کی تجدید کا دن ہے۔

1947 میں قیامِ پاکستان کے وقت مسلح افواج کو محدود وسائل کا سامنا تھا، تاہم مسلسل پیشہ ورانہ تربیت اور ادارہ جاتی ترقی کے ذریعے پاکستان کی مسلح افواج ایک طاقتور جنگی قوت کے طور پر ابھریں۔ ستمبر 1965 میں جہاں پاک فوج اور پاک فضائیہ نے دشمن کی پیش قدمی کو ناکام بنایا، وہاں پاک بحریہ نے تاریخی ’آپریشن دوارکا‘ (آپریشن سومناتھ) سرانجام دیا۔ 7 اور 8 ستمبر 1965 کی درمیانی شب پی این ایس بابر، خیبر، بدر اور دیگر جنگی جہازوں نے بھارتی ساحلی شہر دوارکا میں قائم رڈار تنصیبات کو کامیابی سے نشانہ بنایا جبکہ آبدوز پی این ایس/ایم غازی کے ذریعے دشمن کی بحری نقل و حرکت کو مفلوج کر دیا گیا۔

چھ دہائیوں بعد، 2025 کے ’معرکۂ حق‘ میں جدید ٹیکنالوجی، ڈرون سسٹمز، الیکٹرانک وارفیئر اور درست نشانہ بنانے والے ہتھیاروں کے دور میں پاک بحریہ نے پیشگی بازداریت (Deterrence) کا مظاہرہ کیا۔ بحیرۂ عرب میں بھارتی بحریہ کی بھاری تعیناتی کے باوجود پاک بحریہ نے جدید نگرانی کے ذریعے ملک کی تجارتی راہداریوں، بندرگاہوں اور ساحلی پٹی کو مکمل طور پر محفوظ رکھا۔ 1965 کے آپریشن دوارکا سے لے کر جدید دفاعی دور کے معرکۂ حق تک کا پیغام واضح ہے کہ پاکستان جنگ کا خواہاں نہیں، تاہم اپنی خودمختاری اور دفاع پر کوئی سمجھوتہ نہیں کرے گا۔