وزیراعلیٰ خیبرپختونخوا کو شہیدوں کے شہر لاڑکانہ آمد پر خوش آمدید، بلاول بھٹو

پاکستان پیپلز پارٹی کے چیئرمین بلاول بھٹو زرداری نے وزیراعلیٰ خیبر پختونخوا سہیل آفریدی کے دورۂ سندھ پر ان کے لیے نیک خواہشات کا اظہار کرتے ہوئے انہیں شہیدوں کے شہر لاڑکانہ آمد پر خوش آمدید کہا ہے۔ اپنے ایک بیان میں بلاول بھٹو نے سیاسی ہم آہنگی پر زور دیتے ہوئے کہا کہ سیاسی قیادت کو برداشت، احترام اور مل جل کر رہنے کی سیاست کی طرف واپس آنا ہو گا، کیونکہ یہ عناصر ہی کسی بھی جمہوریت کی بنیاد ہیں۔

وزیراعلیٰ خیبر پختونخوا سہیل آفریدی نے چیئرمین پیپلز پارٹی کی جانب سے ملنے والے اس پیغام پر ان کا شکریہ ادا کرتے ہوئے کہا کہ جمہوریت کا اصل حسن یہی ہے کہ ملک میں سیاست اور اظہارِ رائے کی مکمل آزادی ہو، عدلیہ آزاد کام کرے اور عوامی مینڈیٹ کو تسلیم کیا جائے۔ سہیل آفریدی نے مزید کہا کہ پارلیمنٹ اور صحافت کو خودمختار ہونا چاہیے اور عوامی مینڈیٹ کے برعکس چور دروازوں کا استعمال اب بند کرنا ہو گا۔ انہوں نے دعویٰ کیا کہ میرپور خاص، عمرکوٹ، حیدرآباد اور کراچی میں عوامی سمندر بانی پی ٹی آئی کے ساتھ کھڑا نظر آئے گا۔