ٹرمپ کے نمائندہ وفد کی روسی صدر سے ملاقات، 3 گھنٹے سے زائد مذاکرات جاری رہے

امریکی صدر ڈونلڈ ٹرمپ کے نمائندوں، خصوصی ایلچی سٹیو وٹکوف اور جیرڈ کشنر پر مشتمل وفد نے ماسکو میں روسی صدر ولادیمیر پوتن سے اہم ملاقات کی ہے۔ امریکی وفد کا ماسکو کے ونوکووا ہوائی اڈے پر پہنچنے پر روسی صدر کے خصوصی نمائندے کیریل دیمترییف نے استقبال کیا۔ کریملن میں ہونے والی یہ ملاقات 3 گھنٹے اور 10 منٹ تک جاری رہی، جسے روسی صدر کے معاون یوری اوشاکوف نے انتہائی کھلا، تعمیری اور اعتماد پر مبنی قرار دیا۔ مذاکرات کے دوران امریکی نمائندوں نے یوکرین جنگ کے جلد خاتمے اور ممکنہ پرامن حل کے لیے مختلف تجاویز پیش کیں، جبکہ صدر پوتن نے وٹکوف اور کشنر کی ثالثی کی کوششوں کو سراہتے ہوئے ٹرمپ کے لیے نیک خواہشات کا اظہار کیا۔ کریملن کی جانب سے تصدیق کی گئی ہے کہ صدر پوتن اور صدر ڈونلڈ ٹرمپ کے درمیان براہ راست رابطے اور سفارتی مذاکرات کا سلسلہ آئندہ بھی جاری رہے گا۔