پاسداران انقلاب کا امریکی بحری جہازوں اور 3 آئل ٹینکرز کو نشانہ بنانے کا دعویٰ

ایرانی پاسدارانِ انقلاب (آئی آر جی سی) کی بحریہ نے اعلان کیا ہے کہ انہوں نے امریکی فورسز کی جانب سے ایرانی آئل ٹینکرز پر کیے گئے حملوں کے جواب میں آبنائے ہرمز اور دیگر علاقوں میں امریکا سے منسلک 6 بحری جہازوں کو نشانہ بنایا ہے। آئی آر جی سی کے مطابق امریکی فورسز نے پہلے 3 ایرانی تیل بردار جہازوں پر حملہ کر کے انہیں نقصان پہنچایا تھا، جس کے ردِعمل میں پاسدارانِ انقلاب نے آبنائے ہرمز میں 3 تیل بردار جہازوں اور دیگر سمندری علاقوں میں 3 امریکی بحری جہازوں پر جوابی کارروائی کی۔

ایرانی پاسدارانِ انقلاب نے آبنائے ہرمز سے گزرنے والے تمام بین الاقوامی بحری جہازوں کو سخت خبردار کیا ہے کہ وہ غیر مجاز راستوں سے گزرنے کی کوشش سے گریز کریں اور آبنائے ہرمز کھلی ہونے سے متعلق امریکی دعووں پر بالکل اعتماد نہ کریں، بصورتِ دیگر انہیں نقصان پہنچایا جا سکتا ہے۔ ایرانی حکام نے واضح کیا کہ آبنائے ہرمز کی مکمل بحالی اور بحری آمد و رفت کی بحالی امریکی بحری و اقتصادی ناکہ بندی کے مکمل خاتمے اور خطے میں جارحانہ عسکری کارروائیوں کی مستقل بندش سے مشروط ہے۔