پاکستان خطے میں پائیدار امن و استحکام کا خواہاں ہے، یوسف رضا گیلانی

اسلام آباد: قائم مقام صدرِ پاکستان سید یوسف رضا گیلانی نے کہا ہے کہ پاکستان ایک امن پسند ملک ہے جو طاقت کے بجائے مکالمے، سفارت کاری اور پرامن ذرائع کو ترجیح دیتا ہے اور خطے میں پائیدار امن و استحکام کا خواہاں ہے۔

یومِ دفاع و شہداء کے موقع پر مسلح افواج کے افسران و جوانوں کو خراجِ تحسین پیش کرتے ہوئے قائم مقام صدر نے کہا کہ 6 ستمبر قومی عزم، اتحاد اور وطن کے دفاع کے لیے لازوال قربانیوں کی یاد تازہ کرتا ہے۔ 1965 کی جنگ میں مسلح افواج نے دشمن کے عزائم کے خلاف غیر معمولی بہادری کا مظاہرہ کیا اور پوری قوم عسکری اداروں کے شانہ بشانہ کھڑی رہی۔ شہداء اور غازیوں کی قربانیاں ہماری آزادی، خودمختاری اور سلامتی کی بنیاد ہیں، اور ان کے خاندانوں کی فلاح و بہبود ہماری قومی ذمہ داری ہے۔

سید یوسف رضا گیلانی نے معرکۂ حق میں مسلح افواج کی بے مثال جرأت، پیشہ ورانہ صلاحیتوں اور خطے میں امن کے لیے ان کے اہم کردار کو سراہا۔ انہوں نے فیلڈ مارشل سید عاصم منیر اور عسکری قیادت کی خدمات کو بھی خراجِ تحسین پیش کرتے ہوئے تاکید کی کہ شہداء کے مشن کو آگے بڑھانے کے لیے قومی اتحاد، جمہوریت اور ملکی ترقی و استحکام کے لیے سب کو مل کر کام کرنا ہوگا۔