نوعمر بچوں کی یہ عادت ان کی صحت کیلئے مسائل پیدا کر سکتی ہے!

تازہ ترین تحقیق میں انکشاف ہوا ہے کہ جو بچے 12 سال کی عمر میں اسمارٹ فون استعمال کرتے ہیں، اُن میں موٹاپے، خراب نیند اور ڈپریشن کے امکانات دیگر بچوں کے مقابلے میں کہیں زیادہ ہوتے ہیں۔

یونیورسٹی آف پینسلوینیا کی ٹیم کی تحقیق، جو Pediatrics جرنل میں شائع ہوئی، میں 10 ہزار سے زائد 12 سالہ بچوں کا جائزہ لیا گیا۔ کچھ بچوں کے پاس اسمارٹ فون تھا اور کچھ کے پاس نہیں۔

نتائج کے مطابق جن بچوں کے پاس 12 سال کی عمر تک اسمارٹ فون تھا، اُن میں ڈپریشن کا خطرہ 31 فیصد، موٹاپے کے امکانات 40 فیصد اور ناکافی نیند کے امکانات 62 فیصد زیادہ پائے گئے۔

ماہرین کا کہنا ہے کہ جتنا جلدی بچہ اسمارٹ فون کا مالک بنتا ہے، اُس کی صحت پر منفی اثرات کا خدشہ اتنا ہی زیادہ ہوتا ہے، اس لیے والدین کو بچوں کے فون کے استعمال پر محتاط رہنے کی ضرورت ہے۔