تامل اداکار روی موہن نے فلمی دنیا سے وقفے کا فیصلہ واپس لے لیا

تامل فلم انڈسٹری کے معروف اداکار روی موہن نے طلاق کا معاملہ حل ہونے تک فلمی دنیا سے دوری اختیار کرنے کا اپنا فیصلہ واپس لیتے ہوئے دوبارہ اداکاری جاری رکھنے کا اعلان کر دیا ہے۔ اداکار کا کہنا ہے کہ انہوں نے انڈسٹری اور مداحوں کی حمایت کے بعد اپنے فیصلے پر نظرثانی کی ہے۔

اپنی اہلیہ آرتی روی سے علیحدگی اور اس کے بعد گلوکارہ وہیلر کینیشا فرانسس کے ساتھ بریک اپ کی وجہ سے سرخیوں میں رہنے والے روی موہن نے اپنے تازہ بیان میں اعتراف کیا کہ انہوں نے فلمی دنیا سے وقفے کا فیصلہ جذبات میں بہہ کر کیا تھا۔

اداکار نے اپنے مداحوں اور فلمی برادری سے معذرت کرتے ہوئے کہا  کہ میں اب خود کو سنیما سے دور نہیں رکھوں گا۔ اپنے پچھلے اعلان سے مداحوں کا دل دکھانے پر مجھے انتہائی افسوس ہے۔ اپنی جذباتی وابستگی کا ذکر کرتے ہوئے روی موہن نے کہا کہ وہ اس سال 46 برس کے ہو رہے ہیں اور ان کی زندگی کے 23 سال فلمی دنیا میں گزرے ہیں۔ ان کا کہنا تھا کہ یہ انتہائی افسوسناک ہے کہ ان کی ایک چھوٹی سی غلطی اور فیصلے نے ان کے چاہنے والوں کو اتنا دکھ پہنچایا۔ تاہم، اب انہوں نے فلم انڈسٹری کے ساتھیوں اور مداحوں کی طرف سے ملنے والی بھرپور محبت اور حمایت کے بعد دوبارہ کیمرے کے سامنے آنے کا حتمی فیصلہ کر لیا ہے۔