مشرقی پنجاب میں بھارتی مظالم پر مبنی فلم ستلج کی عالمی سطح پر نمائش

عالمی سطح پر سکھوں کے خلاف بھارتی مظالم کو بے نقاب کرنے والی فلم ’ستلج‘ پر پابندی کے باوجود بھارت میں اس کی نمائش کا سلسلہ جاری ہے۔ قطری نشریاتی ادارے کے مطابق، یہ فلم مقتول سکھ رہنما جسونت سنگھ کھالرا کی زندگی پر مبنی ہے، جنہوں نے پنجاب میں بھارتی فورسز کے ہاتھوں ماورائے عدالت ہلاکتوں کی تحقیقات کر کے نئی دہلی کا مکروہ چہرہ دنیا کے سامنے عیاں کیا تھا۔ فلم میں مرکزی کردار نبھانے والے مشہور بھارتی اداکار دلجیت دوسانجھ کا کہنا ہے کہ 1995ء میں جسونت سنگھ کی آواز دبانے والی بھارتی حکومت آج 2026ء میں اس سچ کو دبانے میں کامیاب نہیں ہو سکتی۔

امریکی جریدے ’واشنگٹن پوسٹ‘ کی رپورٹ کے مطابق، مشرقی پنجاب کے مختلف دیہات میں سکھ تنظیموں، مقامی کارکنوں اور عام شہریوں نے حکومتی پابندیوں کو ہوا میں اڑاتے ہوئے فلم کی ’کمیونٹی اسکریننگز‘ کا آغاز کر دیا ہے، جس کے ذریعے جبری گمشدگیوں، حراستی ہلاکتوں اور سکھوں کی خفیہ تدفین کے ہولناک حقائق سامنے لائے جا رہے ہیں۔ فلم کے ڈائریکٹر ہنی تریہان نے انکشاف کیا ہے کہ اقتدار میں موجود لوگ آزادئ اظہارِ رائے پر پابندی لگا کر ہر بیانیے کو کنٹرول کرنا چاہتے ہیں، اور مودی حکومت صرف ایسی فلموں کو فروغ دیتی ہے جو اس کے اپنے ہندوتوا اور قوم پرستانہ ایجنڈے کے مطابق ہوں۔ دوسری جانب، امرتسر میں سکھ مذہبی اور سیاسی رہنماؤں نے فلم ’ستلج‘ پر پابندی کے خلاف شدید احتجاج کرتے ہوئے مطالبہ کیا ہے کہ سچائی پر مبنی اس فلم کو بغیر کسی رکاوٹ کے فوری طور پر باقاعدہ ریلیز کرنے کی اجازت دی جائے