وزیراعظم شہباز شریف کی امریکی صدر ٹرمپ سے ڈیڈلائن 2 ہفتے بڑھانے کی اپیل

وزیراعظم شہباز شریف نے امریکی صدر ڈونلڈ ٹرمپ سے ایران سے متعلق ڈیڈ لائن میں دو ہفتے کی توسیع کی اپیل کر دی ہے۔

اپنے بیان میں وزیراعظم نے کہا کہ خطے میں کشیدگی کم کرنے کے لیے سفارتی کوششیں تیزی سے جاری ہیں، اور موجودہ صورتحال میں تمام فریقین کو تحمل اور دانشمندی کا مظاہرہ کرنا ہوگا۔

انہوں نے جذبہ خیرسگالی کے تحت ایرانی قیادت سے درخواست کی کہ وہ دو ہفتوں کے لیے آبنائے ہرمز کو کھلا رکھیں، جبکہ تمام متعلقہ ممالک بھی اسی مدت کے لیے جنگ بندی کریں تاکہ سفارتی عمل کے ذریعے مستقل امن کی راہ ہموار کی جا سکے۔

وزیراعظم کا کہنا تھا کہ اگر فریقین نے موقع سے فائدہ اٹھایا تو خطے کو ایک بڑے تصادم سے بچایا جا سکتا ہے۔

دوسری جانب اس سے قبل امریکی صدر ڈونلڈ ٹرمپ بھی ایران کو دی گئی ڈیڈ لائن میں توسیع کا عندیہ دے چکے ہیں۔ امریکی ٹی وی کو دیے گئے انٹرویو میں انہوں نے کہا کہ ثالثوں کے ذریعے جاری مذاکرات میں پیش رفت ہوئی ہے، جس کے باعث ڈیڈ لائن بڑھانے پر غور کیا جا رہا ہے۔