امریکی ڈیموکریٹس کا ٹرمپ کیخلاف آئین کی 25 ویں ترمیم کے تحت کارروائی کا مطالبہ

امریکہ میں ڈیموکریٹک پارٹی کے سرکردہ رہنماؤں نے صدر ڈونلڈ ٹرمپ کے حالیہ بیانات پر شدید تشویش کا اظہار کرتے ہوئے مطالبہ کیا ہے کہ ان کے خلاف آئین کی 25 ویں ترمیم کے تحت کارروائی کی جائے۔ اس ترمیم کے تحت اگر نائب صدر اور کابینہ کی اکثریت متفق ہو جائے کہ صدر اپنے فرائض انجام دینے کے قابل نہیں رہے، تو اختیارات نائب صدر کو منتقل کیے جا سکتے ہیں۔ اگرچہ فی الحال نائب صدر جے ڈی وینس یا کابینہ کی جانب سے ایسے کسی اقدام کا اشارہ نہیں ملا، لیکن ڈیموکریٹک قانون سازوں نے ٹرمپ پر ‘نسل کشی’ جیسے جنگی جرائم کی دھمکیاں دینے کا الزام عائد کرتے ہوئے کہا ہے کہ انہیں جوہری ہتھیاروں کے کوڈز تک رسائی حاصل نہیں ہونی چاہیے۔

کانگریس کی رکن الیگزینڈریا اوکاسیو کورتیز نے صدر کی ذہنی حالت پر سوال اٹھاتے ہوئے کہا کہ ایک پوری تہذیب کو مٹانے جیسے بیانات عالمی امن کے لیے سنگین خطرہ ہیں۔ ایوانِ نمائندگان کے سینئر ڈیموکریٹس نے ریپبلکنز سے مطالبہ کیا ہے کہ وہ مشرقِ وسطیٰ میں جنگ روکنے کے لیے ان کا ساتھ دیں، ورنہ صدر ٹرمپ ملک کو تیسری عالمی جنگ کی طرف دھکیل سکتے ہیں۔ واضح رہے کہ ایوانِ نمائندگان کا اجلاس 14 اپریل کو تعطیلات کے بعد دوبارہ طلب کیا گیا ہے، جہاں اس معاملے پر فیصلہ کن بحث اور ممکنہ قانون سازی متوقع ہے۔