امریکی صدر اور ایران کے درمیان جنگ بندی، یورپی یونین کا خیرمقدم

یورپی یونین نے امریکہ اور ایران کے درمیان دو ہفتوں کی جنگ بندی کے معاہدے کا خیرمقدم کرتے ہوئے اسے مشرقِ وسطیٰ میں کشیدگی کم کرنے کی جانب ایک “خوش آئند پیش رفت” قرار دیا ہے۔ یورپی یونین کی اعلیٰ عہدیدار کایا کالاس (Kaya Kallas) نے اپنے ایک خصوصی بیان میں پاکستان کے وزیرِ خارجہ اسحاق ڈار کی سفارتی کوششوں کی بھرپور تعریف کی ہے۔ انہوں نے اعتراف کیا کہ وزیرِ خارجہ اسحاق ڈار نے اس معاہدے کو ممکن بنانے میں کلیدی کردار ادا کیا اور ان کی مسلسل محنت کے نتیجے میں ہی فریقین مذاکرات کی اس سطح پر پہنچنے میں کامیاب ہوئے ہیں۔ کایا کالاس نے زور دیا کہ عالمی امن کے لیے ثالثی کا دروازہ ہر وقت کھلا رہنا چاہیے تاکہ مستقبل میں کسی بھی بڑے بحران سے بچا جا سکے۔

یورپی یونین کی عہدیدار نے مزید کہا کہ اگرچہ جنگ بندی ایک بڑا قدم ہے، لیکن جنگ کے بنیادی اسباب تاحال موجود ہیں جن کے حل کے لیے سنجیدہ کوششوں کی ضرورت ہے۔ انہوں نے مطالبہ کیا کہ عالمی تجارت اور استحکام کے پیشِ نظر ‘آبنائے ہرمز’ کو بحری آمد و رفت کے لیے فوری طور پر کھولا جائے۔ کایا کالاس کا کہنا تھا کہ یورپی یونین اس حوالے سے تمام علاقائی شراکت داروں کے ساتھ مسلسل رابطے میں ہے اور امن کے لیے کی جانے والی تمام عالمی کوششوں کی بھرپور حمایت جاری رکھے گی۔ سفارتی ماہرین یورپی یونین کی جانب سے پاکستانی وزیرِ خارجہ کے کردار کی ستائش کو پاکستان کی خارجہ پالیسی کی ایک بڑی کامیابی قرار دے رہے ہیں۔