تحریک انصاف کا ایران اور امریکا کے درمیان جنگ بندی کا خیرمقدم

پاکستان تحریکِ انصاف (پی ٹی آئی) نے امریکہ اور ایران کے درمیان دو ہفتوں کے لیے جنگ بندی کے اعلان کا باقاعدہ خیرمقدم کرتے ہوئے اسے خطے کے لیے ایک مثبت پیش رفت قرار دیا ہے۔ پارٹی کی جانب سے جاری کردہ اعلامیہ میں کہا گیا ہے کہ پی ٹی آئی کا موقف ہمیشہ سے واضح رہا ہے کہ جنگ اور تباہی کے بجائے مسائل کا حل صرف مذاکرات کے ذریعے ہی ممکن ہے۔ اعلامیہ میں اس امید کا اظہار کیا گیا کہ دونوں فریقین جنگ بندی کی شرائط پر سختی سے عمل درآمد کو یقینی بنائیں گے تاکہ مشرقِ وسطیٰ میں مستقل امن اور استحکام کی راہ ہموار ہو سکے۔

تحریکِ انصاف نے اپنے بیان میں مزید کہا کہ جنگوں کا نتیجہ ہمیشہ معصوم جانوں کے ضیاع اور بڑے پیمانے پر تباہی کی صورت میں نکلتا ہے، اس لیے سفارتی حل کو ترجیح دینا وقت کی اہم ضرورت ہے۔ اعلامیہ میں ان تمام عالمی و علاقائی ثالثوں کا شکریہ ادا کیا گیا جنہوں نے اس جنگ بندی کو ممکن بنانے کے لیے کردار ادا کیا۔ پی ٹی آئی نے تمام متعلقہ فریقین اور اسٹیک ہولڈرز پر زور دیا ہے کہ وہ خطے کی مجموعی سلامتی کو مدنظر رکھتے ہوئے اب ایک دیرپا اور مستقل حل کی جانب پیش قدمی کریں تاکہ مستقبل میں ایسے بحرانوں سے بچا جا سکے۔