ملک میں ایک ماہ کے دوران 5 ہزار سے زائد نئی کمپنیاں رجسٹرڈ

سیکورٹیز اینڈ ایکس چینج کمیشن آف پاکستان (SECP) میں اکتوبر 2026 کے دوران 5 ہزار 3 نئی کمپنیاں رجسٹرڈ ہوئی ہیں، جس کے بعد ملک میں رجسٹرڈ کمپنیوں کی مجموعی تعداد 3 لاکھ 21 ہزار 794 تک پہنچ گئی ہے۔ ایس ای سی پی کے مطابق ان میں سے 99.9 فیصد رجسٹریشنز آن لائن عمل میں لائی گئیں۔ نئی کمپنیوں میں سب سے زیادہ 991 کمپنیاں آئی ٹی سیکٹر میں رجسٹرڈ ہوئیں، جبکہ ٹریڈنگ میں 767 اور سروسز میں 594 کمپنیاں شامل ہیں۔ صوبائی سطح پر پنجاب 2 ہزار 663 نئی کمپنیوں کے ساتھ پیش پیش رہا، جبکہ 173 غیر ملکی سرمایہ کار ڈائریکٹر بنے اور خواتین کی شراکت داری 13 فیصد ریکارڈ کی گئی۔ ایس ای سی پی کے چیئرمین ڈاکٹر کبیر سدھو کا کہنا ہے کہ کارپوریٹ ڈیجیٹلائزیشن اور کاروباری آسانیاں پیدا کرنے سے ملک میں سرمایہ کاری اور روزگار کے مواقع میں مسلسل اضافہ ہو رہا ہے۔