اسلام آباد ایئرپورٹ پر اسٹیٹ لاؤنج کی تعمیر کا سنگ بنیاد رکھ دیا گیا

پاکستان ایئرپورٹس اتھارٹی (پی اے اے) نے اسلام آباد انٹرنیشنل ایئرپورٹ پر عالمی معیار کے نئے اسٹیٹ لاؤنج کی تعمیر کا باقاعدہ آغاز کر دیا ہے، جس کے منصوبے کا سنگِ بنیاد وفاقی وزیر دفاع خواجہ آصف نے رکھا۔

پاکستان ایئرپورٹس اتھارٹی کے مطابق اس نئے اسٹیٹ لاؤنج کے قیام کا بنیادی مقصد عالمی معیار کی ریاستی مہمان نوازی کو یقینی بنانا، غیر ملکی سربراہانِ مملکت اور اعلیٰ سطح کے بین الاقوامی وفود کے لیے پروٹوکول و سیکیورٹی انتظامات کو جدید خطوط پر استوار کرنا ہے۔ سنگِ بنیاد کی تقریب کے دوران وزیر دفاع خواجہ آصف نے یادگاری تختی کی نقاب کشائی کی اور ایئرپورٹ کے احاطے میں پودا لگا کر شجرکاری مہم کا بھی افتتاح کیا۔

تقریب میں سیکرٹری دفاع لیفٹیننٹ جنرل (ر) محمد علی، ڈائریکٹر جنرل پی اے اے ایئر وائس مارشل شاہد افضال، چیف آپریٹنگ افسر اسلام آباد ایئرپورٹ آفتاب گیلانی اور دیگر اعلیٰ سول و عسکری حکام نے شرکت کی۔ پی اے اے حکام کا کہنا ہے کہ یہ منصوبہ ملک کے بنیادی ایوی ایشن انفراسٹرکچر کو جدید بین الاقوامی معیار پر لانے اور غیر ملکی معززین کی مؤثر میزبانی کی سمت ایک اہم پیش رفت ثابت ہو گا۔