کیف میں روسی ڈرون حملے کے نتیجے میں 3 سالہ بچہ دادا، دادی سمیت ہلاک

یوکرین کے صدر وولودیمیر زیلنسکی نے انکشاف کیا ہے کہ دارالحکومت کیف کے ایک نواحی گاؤں میں کیے گئے روسی ڈرون حملے کے نتیجے میں ایک 3 سالہ معصوم بچہ اور اس کے دادا دادی موقع پر ہی ہلاک ہو گئے۔ زیلنسکی نے اپنے سوشل میڈیا پلیٹ فارم ‘ٹیلی گرام’ پر جاری ایک جذباتی بیان میں مزید بتایا کہ ڈرون حملوں کے ساتھ ساتھ رات گئے دارالحکومت پر کیے گئے بیلسٹک میزائل حملے کے نتیجے میں ایک اور شہری بھی اپنی جان سے ہاتھ دھو بیٹھا ہے۔

یوکرینی صدر نے عالمی برادری کو مخاطب کرتے ہوئے کہا کہ یورپ، امریکہ اور یوکرین ایک طویل عرصے سے اس جاری روسی جنگ کو روکنا چاہتے ہیں، لیکن دوسری جانب روسی صدر پوتن جنگ کو مزید طویل کرنے کے لیے بیلسٹک میزائلوں اور کامیکازی ڈرونز کا مسلسل استعمال کر رہے ہیں۔ انہوں نے زور دیا کہ ایسی صورتحال میں روس پر عالمی سطح پر مزید معاشی و سیاسی دباؤ بڑھانے کی شدید ضرورت ہے۔ واضح رہے کہ روس نے حال ہی میں کیف اور دیگر شہروں پر اپنے حملے تیز کر دیے ہیں، جبکہ جواب میں یوکرینی افواج ماسکو کی جنگی صلاحیتوں کو مفلوج کرنے کے لیے روسی تیل کی تنصیبات اور لاجسٹک انفراسٹرکچر کو نشانہ بنا رہی ہیں