ایران نے آبنائے ہرمز مکمل طور پر کھولنے کیلئے امریکا کو 6 شرائط پیش کر دیں

ایران کی قومی سلامتی کونسل کے سیکرٹری ذوالقدر نے اعلان کیا ہے کہ آبنائے ہرمز کو مکمل طور پر کھولنے کے لیے امریکا کو ایران کی طرف سے پیش کردہ 6 بنیادی شرائط پر عمل کرنا ہوگا۔ ان شرائط میں مطالبہ کیا گیا ہے کہ ایران کو کسی بھی زبان یا انداز میں دھمکانے کا سلسلہ بند کیا جائے اور قوم کی توہین نہ کی جائے؛ ایران اور اس کے اتحادیوں پر مسلط کردہ جنگ کا دائمی خاتمہ کیا جائے؛ اور غیر مشروط طور پر ایرانی عوام کے منجمد اور چرائے گئے اثاثے فوری طور پر واگزار کیے جائیں۔

سیکرٹری قومی سلامتی کونسل نے مزید کہا کہ امریکا کو ایران کی بحری ناکہ بندی ختم کر کے اپنی افواج کو ایران کے ارد گرد کے تمام علاقوں سے فوراً ہٹانا ہوگا، ایران کو پہنچنے والے تمام معاشی و جانی نقصانات کا بغیر کسی کمی کے مکمل ہرجانہ ادا کرنا ہوگا، اور ایرانی قوم پر عائد کردہ تمام نامنصفانہ و غیر قانونی پابندیاں منسوخ کرنا ہوں گی۔ ذوالقدر نے واضح کیا کہ اگر امریکا نے اپنا جارحانہ رویہ نہ بدلا تو آبنائے ہرمز کو ہرگز دوبارہ نہیں کھولا جائے گا، اور جنگ ہو یا مذاکرات، ایران اپنے ان اصولی اور دفاعی ارادوں سے ایک انچ بھی پیچھے نہیں ہٹے گا۔