بحیرہ کیسپین میں ایرانی جہاز پر حملہ، روس کا یوکرین پر سخت ردعمل

بحیرہ کیسپین میں ایرانی بحری جہاز کو نشانہ بنائے جانے کے معاملے پر روس کی جانب سے انتہائی سخت ردعمل سامنے آیا ہے۔ روسی حکومت کی جانب سے جاری کردہ بیان میں کہا گیا ہے کہ بحیرہ کیسپین کے علاقے میں ایرانی جہاز پر حملہ دراصل براہِ راست ایران پر حملے کے مترادف ہے، جس کے سنگین نتائج برآمد ہو سکتے ہیں۔

کریملن کے ترجمان دمتری پیسکوف نے میڈیا سے گفتگو کرتے ہوئے الزام عائد کیا کہ ایرانی بحری جہاز پر یہ حملہ یوکرین کے خطرناک اور جارحانہ عزائم کا واضح ثبوت ہے۔ انہوں نے کہا کہ یوکرین خطے میں دہشت گردانہ اقدامات اور حملوں کا دائرہ کار مسلسل وسیع کر رہا ہے، جو علاقائی امن و استحکام کے لیے ایک بڑا خطرہ بن چکا ہے۔

کریملن ترجمان کا مزید کہنا تھا کہ یوکرین نے سی پی سی (Caspian Pipeline Consortium) پائپ لائن کے اہم انفراسٹرکچر کو بھی نشانہ بنایا ہے، جس کے بعد یوکرین کے خلاف سخت ترین جوابی کارروائی کی ضرورت پہلے سے کہیں زیادہ بڑھ گئی ہے۔ روس نے خبردار کیا کہ اس قسم کے اشتعال انگیز واقعات خطے میں سکیورٹی کی صورتحال کو مزید زوال پذیر اور کشیدگی کو شدید بنانے کا باعث بن رہے ہیں۔