ملکی معاشی اشاریوں میں بہتری، مگر مہنگائی بدستور بڑا چیلنج ہے: ایس اینڈ پی گلوبل رپورٹ

رپورٹ کے مطابق پاکستان کی معیشت تدریجی استحکام کی جانب گامزن ہے، تاہم افراطِ زر (مہنگائی) اب بھی مرکزی بینک کے مقررہ ہدف سے زیادہ ہے۔ اس کے علاوہ مشرقِ وسطیٰ میں جاری کشیدگی، عالمی سطح پر اجناس کی قیمتوں میں غیر یقینی صورتحال اور موسمیاتی تبدیلی کے اثرات ملکی معیشت کے لیے بڑے چیلنجز بنے ہوئے ہیں۔ ایس اینڈ پی کے مطابق ان تمام عوامل کے باوجود مالی سال 2027 میں پاکستان کی معاشی شرحِ نمو 3.5 فیصد رہنے کا امکان ہے، جبکہ دسمبر 2026 تک زرمبادلہ کے ذخائر 19.5 ارب ڈالر تک پہنچنے کی توقع ہے۔

ایس اینڈ پی گلوبل کے پرنسپل اکانومسٹ احمد مبین نے معاشی صورتحال پر تبصرہ کرتے ہوئے کہا کہ بیرونی مالیاتی دباؤ کو کم کرنے میں بیرونِ ملک مقیم پاکستانیوں کی جانب سے بھیجی جانے والی مضبوط ترسیلاتِ زر نے اہم کردار ادا کیا ہے، جس سے کرنٹ اکاؤنٹ خسارہ محدود رہنے کی امید ہے۔ تاہم، انہوں نے زور دیا کہ بیرونی قرضوں کی بروقت ادائیگیوں کے پیشِ نظر سخت مالیاتی نظم و ضبط برقرار رکھنا ناگزیر ہے، اسی لیے سٹیٹ بینک کسی بھی جلد بازی سے گریز کرتے ہوئے محتاط اندازِ فکر جاری رکھے گا۔