پنجاب کے ہسپتالوں میں ایڈہاک ڈاکٹرز کو انتظامی عہدوں پر تعینات کرنے پر پابندی

لاہور: پنجاب بھر کے ہسپتالوں میں ایڈہاک ڈاکٹرز کو انتظامی عہدوں پر تعینات کرنے پر پابندی عائد کر دی گئی ہے۔
محکمہ سپیشلائزڈ ہیلتھ پنجاب نے ایڈہاک افسران کی ڈی ایم ایس اور اے ایم ایس پوسٹنگ فوری واپس لینے کا حکم جاری کیا ہے اور ہدایت کی ہے کہ انتظامی عہدے صرف باقاعدہ تقرری والے افسران کو دیے جائیں۔
محکمے نے میڈیکل یونیورسٹیوں، کالجز اور ٹیچنگ ہسپتالوں کو مراسلہ بھیج کر کہا کہ ایڈہاک تقرریاں محض عارضی ہیں اور کسی بھی وقت ختم کی جا سکتی ہیں۔
ایڈہاک افسران کو انتظامی عہدہ دینے کو رولز کی خلاف ورزی قرار دیتے ہوئے قانونی پیچیدگیوں سے خبردار کیا گیا ہے۔