پی ٹی اے نے غیر قانونی مواد شیئر کرنے والوں کو خبردار کر دیا

پاکستان ٹیلی کمیونیکشن اتھارٹی (پی ٹی اے) نے سوشل میڈیا پلیٹ فارمز پر غیر قانونی مواد شیئر کرنے والوں کو سخت وارننگ جاری کر دی ہے۔

پی ٹی اے کے ترجمان کے مطابق ڈیجیٹل پلیٹ فارمز پر اظہارِ رائے کی آزادی ہر شہری کا حق ہے، تاہم اس آزادی کی آڑ میں غیر قانونی سرگرمیوں یا مواد کی تشہیر کسی صورت قابلِ قبول نہیں۔ ترجمان نے واضح کیا کہ مذاہب، رسالت یا مقدس شخصیات کی توہین، کسی فرد یا ادارے کے خلاف اشتعال انگیز مواد، دفاع اور دیگر قومی اداروں کے خلاف نفرت انگیز یا جھوٹا پروپیگنڈا، فحش و غیر اخلاقی مواد اور جعلی خبروں کی تشہیر پیکا ایکٹ 2016 کے تحت قابلِ گرفت جرم ہے۔

اتھارٹی نے عوام سے اپیل کی ہے کہ ملک میں امن و امان اور عوامی مفاد کے پیشِ نظر ایسے غیر قانونی مواد کی فوری اطلاع PTA CMS موبائل ایپ کے ذریعے دیں تاکہ بروقت کارروائی عمل میں لائی جا سکے۔