سٹاک مارکیٹ میں اُتار چڑھاؤ، ہنڈرڈ انڈیکس مثبت زون میں بند ہوا

کاروبار کے آغاز میں ہی مندی کے بادل چھا گئے اور ہنڈرڈ انڈیکس ابتدائی طور پر 348 پوائنٹس کی کمی سے 1 لاکھ 49 ہزار 291 کی سطح پر آگیا۔ ٹریڈنگ کے دوران صورتحال اس وقت مزید سنگین ہوئی جب انڈیکس ایک موقع پر 2000 سے زائد پوائنٹس تک گر گیا تھا۔ تاہم، دن کے اختتام پر مارکیٹ نے ریکوری کی اور ہنڈرڈ انڈیکس 809 پوائنٹس کے اضافے کے ساتھ 1 لاکھ 51 ہزار 207 کی سطح پر بند ہوا۔ یاد رہے کہ گزشتہ کاروباری ہفتے کے آخری روز انڈیکس 1 لاکھ 50 ہزار 398 پوائنٹس پر بند ہوا تھا۔

ایشیائی مارکیٹس پر اثرات: مشرقِ وسطیٰ میں بڑھتی ہوئی کشیدگی کے باعث ایشیائی اسٹاک مارکیٹس میں بھی عمومی طور پر مندی کا رجحان دیکھا گیا:

• انڈونیشیا: جکارتہ انڈیکس میں سب سے زیادہ 2.5 فیصد کی بڑی گراوٹ ریکارڈ کی گئی۔

• چین و ہانگ کانگ: شنگھائی کمپوزٹ اور ہینگ سینگ انڈیکس میں 1 فیصد مندی رہی۔

• ملائیشیا: فٹسی برسا انڈیکس بھی 1 فیصد تک گر گیا۔

• جاپان: نکی انڈیکس (Nikkei) واحد بڑی مارکیٹ رہی جہاں 1 فیصد سے زائد کا اضافہ دیکھا گیا۔

ماہرین کے مطابق ایران اور امریکہ کے درمیان بڑھتی ہوئی کشیدگی عالمی سطح پر تیل کی قیمتوں اور سپلائی چین کو متاثر کر سکتی ہے، جس کا براہِ راست اثر آنے والے دنوں میں اسٹاک مارکیٹس پر برقرار رہنے کا خدشہ ہے۔