دو روزہ مندی کے بعد سٹاک مارکیٹ میں تیزی، کاروبار کا مثبت رجحان رہا

پاکستان اسٹاک ایکسچینج (پی ایس ایکس) میں مثبت رجحان اور زبردست تیزی کی واپسی کے باعث ہنڈرڈ انڈیکس نے ایک بار پھر 1 لاکھ 75 ہزار پوائنٹس کی اہم نفسیاتی حد بحال کر لی ہے۔ کاروباری ہفتے کے تیسرے روز (بدھ کو) ٹریڈنگ کے آغاز پر ہی انویسٹرز کی جانب سے جارحانہ خریداری دیکھی گئی، جس کے باعث ایک موقع پر کے ایس ای (KSE-100) انڈیکس 3,000 سے زائد پوائنٹس کے اضافے کے ساتھ 1 لاکھ 76 ہزار 701 پوائنٹس کی بلند سطح پر پہنچ گیا۔ اگرچہ بعد ازاں پرافٹ ٹیکنگ کے باعث انڈیکس میں تیزی کا یہ رجحان برقرار نہ رہ سکا اور معمولی کمی دیکھی گئی، تاہم مارکیٹ مثبت زون میں ہی بند ہونے میں کامیاب رہی۔ کاروباری دن کے اختتام پر ہنڈرڈ انڈیکس 1 لاکھ 75 ہزار 285 پوائنٹس کی سطح پر بند ہوا۔ یاد رہے کہ اس سے قبل گزشتہ کاروباری روز مارکیٹ شدید مندی کا شکار رہی تھی اور انڈیکس 6,408 پوائنٹس کی بڑی گراوٹ کے ساتھ 1 لاکھ 73 ہزار 518 پوائنٹس پر بند ہوا تھا، جسے مارکیٹ نے آج بڑی حد تک ریکور کر لیا ہے۔