خلیجِ فارس کشیدگی؛ پاکستان اسٹاک ایکسچینج شدید مندی کا شکار

خلیجِ فارس میں بڑھتی ہوئی تزویراتی کشیدگی کے منفی اثرات پاکستان اسٹاک ایکسچینج پر بھی نظر آنے لگے ہیں، جہاں کاروبار کا اختتام شدید مندی پر ہوا ہے۔ کاروباری دن کے دوران کے ایس ای (KSE) 100 انڈیکس مجموعی طور پر 2315 پوائنٹس کی بڑی گراؤٹ کے بعد 179927 کی سطح پر بند ہوا۔ مارکیٹ میں اتار چڑھاؤ دیکھا گیا جہاں انڈیکس کی یومیہ بلند ترین سطح 181148 جبکہ کم ترین سطح 179448 پوائنٹس ریکارڈ کی گئی۔ سرمایہ کاروں کی محتاط طرزِ عمل کے باعث دن بھر 35 ارب 55 کروڑ روپے مالیت کے 84 کروڑ 53 لاکھ شیئرز کے سودے ہوئے، تاہم مارکیٹ پر مندی کا غلبہ رہا۔ مارکیٹ ذرائع کے مطابق، دن بھر مجموعی طور پر 565 کمپنیوں کے شیئرز کا کاروبار ہوا، جن میں سے 335 کمپنیوں کی قیمتوں میں کمی ریکارڈ کی گئی جبکہ صرف 128 کمپنیوں کے شیئرز کی قیمتوں میں اضافہ ہوا اور باقی کمپنیوں کی قیمتیں مستحکم رہیں۔