مشرق وسطیٰ کی غیر یقینی صورتحال، سٹاک مارکیٹ میں مندی کا رجحان برقرار

کراچی: مشرقِ وسطیٰ کی غیر یقینی صورتحال اور ایران امریکہ کشیدگی کے باعث پاکستان سٹاک ایکسچینج (PSX) میں کاروباری ہفتے کا آغاز شدید مندی کے ساتھ ہوا۔ سرمایہ کاروں میں پھیلے خوف کے باعث ایک موقع پر ہنڈرڈ انڈیکس 7,000 سے زائد پوائنٹس کی تاریخی کمی کے ساتھ 144,656 کی سطح تک گر گیا تھا۔ تاہم، اختتامی سیشن میں کچھ ریکوری دیکھی گئی اور مارکیٹ 4,864 پوائنٹس کی مجموعی گراوٹ کے ساتھ 146,842 پر بند ہوئی۔

عالمی سطح پر بھی اس کے اثرات نمایاں رہے، جہاں جاپان کا نکئی انڈیکس 5.5 فیصد اور جنوبی کوریا کا کوسپی 5 فیصد تک گر گیا۔ ماہرین کے مطابق، خطے میں بڑھتی ہوئی عسکری کشیدگی اور جیٹ فیول کی قیمتوں میں اضافے نے عالمی سپلائی چین اور مالیاتی منڈیوں کو غیر مستحکم کر دیا ہے۔