پاکستان سٹاک مارکیٹ میں شدید مندی، 5000 پوائنٹس کی کمی

کراچی/ٹوکیو: امریکی صدر کے جارحانہ خطاب اور مشرقِ وسطیٰ میں جنگ کے پھیلاؤ کے خدشات نے پاکستان سمیت ایشیائی اسٹاک مارکیٹوں کو اپنی لپیٹ میں لے لیا ہے۔ کاروباری ہفتے کے چوتھے روز (جمعرات) پاکستان اسٹاک ایکسچینج میں کاروبار کا آغاز ہوتے ہی شدید فروخت کا رجحان دیکھا گیا، جس کے باعث ہنڈرڈ انڈیکس 5 ہزار سے زائد پوائنٹس کی کمی کے ساتھ 1 لاکھ 50 ہزار کی سطح پر آ گیا ہے۔

یاد رہے کہ گزشتہ روز انڈیکس 1 لاکھ 55 ہزار 511 پوائنٹس کی تاریخی سطح پر بند ہوا تھا، تاہم عالمی سیاسی منظرنامے میں تبدیلی نے تمام تیزی کو مندی میں بدل دیا ہے۔ عالمی سطح پر بھی صورتحال مختلف نہیں ہے؛ جاپان کا نکی (Nikkei) انڈیکس ڈھائی فیصد کی بڑی گراوٹ کا شکار ہوا، جبکہ ہانگ کانگ کا ہانگ سینگ (Hang Seng) ایک فیصد اور چین کا شنگھائی کمپوزٹ بھی معمولی مندی کے ساتھ ٹریڈ کر رہا ہے۔ ماہرین کے مطابق، تیل کی بڑھتی ہوئی قیمتیں اور علاقائی جنگ کا خطرہ سرمایہ کاروں کو مارکیٹ سے نکلنے پر مجبور کر رہا ہے۔