پاکستان سٹاک مارکیٹ میں تیزی، ایک لاکھ 78 ہزار پوائنٹس کی حد بحال

پاکستان اسٹاک مارکیٹ (PSX) میں کاروباری ہفتے کے چوتھے روز زبردست تیزی کا رجحان دیکھا گیا، جس کے نتیجے میں ۱۰۰ انڈیکس ایک لاکھ ۷۸ ہزار پوائنٹس کی تاریخی حد پر بحال ہو گیا ہے۔ ٹریڈنگ کے آغاز سے ہی مارکیٹ میں زبردست جوش و خروش دیکھا گیا اور ایک وقت میں انڈیکس 3 ہزار سے زائد پوائنٹس کے اضافے کے ساتھ ایک لاکھ ۷۸ ہزار ۳۶۷ پوائنٹس کی بلند ترین سطح پر پہنچ گیا۔ اگرچہ اختتام پر معمولی پرافٹ ٹیکنگ ہوئی، تاہم مثبت رجحان برقرار رہنے کے باعث کاروباری دن کا اختتام ۲ ہزار ۸۳۷ پوائنٹس کی بڑی برتری کے ساتھ ایک لاکھ78 ہزار 123 پوائنٹس پر ہوا۔ واضح رہے کہ گزشتہ کاروباری روز اسٹاک مارکیٹ کا ہنڈرڈ انڈیکس ایک لاکھ ۷۵ ہزار ۲۸۵ پوائنٹس کی سطح پر بند ہوا تھا، اور آج کی اس شاندار تیزی نے سرمایہ کاروں کے اعتماد کو مزید تقویت دی ہے۔