سٹاک مارکیٹ میں تیزی، کاروبار کا مثبت رجحان رہا

پاکستان سٹاک ایکسچینج (PSX) میں کاروباری ہفتے کے تیسرے روز خریداروں کا غلبہ رہا اور مارکیٹ مثبت زون میں بند ہوئی۔ دن کا آغاز زبردست تیزی کے ساتھ ہوا جہاں ابتدائی سیشن میں کے ایس ای-100 انڈیکس 881 پوائنٹس کے اضافے کے ساتھ 1 لاکھ 66 ہزار کی حد عبور کر گیا تھا۔ اگرچہ بعد میں کچھ منافع بٹواری دیکھی گئی، تاہم کاروباری روز کے اختتام پر 100 انڈیکس 779 پوائنٹس کی نمایاں برتری کے ساتھ 1 لاکھ 65 ہزار 930 کی سطح پر بند ہوا۔ بازارِ حصص میں آج 10 ارب 41 کروڑ روپے سے زائد مالیت کے 13 کروڑ 2 لاکھ سے زائد شیئرز کا لین دین ہوا۔ واضح رہے کہ گزشتہ کاروباری روز اچانک مندی کے باعث انڈیکس 814 پوائنٹس گر کر 1 لاکھ 65 ہزار 151 پر بند ہوا تھا، جسے مارکیٹ نے آج بڑی حد تک ریکور کر لیا ہے۔