آزاد کشمیر میں مرحلہ وار الیکشن دھاندلی کیلئے کرائے گئے: بلاول بھٹو پھر برس پڑے

پاکستان پیپلز پارٹی کے چیئرمین بلاول بھٹو زرداری نے آزاد کشمیر کے علاقے باغ میں عظیم الشان جلسۂ عام سے خطاب کرتے ہوئے الزام عائد کیا ہے کہ آزاد کشمیر کے انتخابات میں مرحلہ وار پولنگ کا مقصد صرف اور صرف دھاندلی کو ممکن بنانا تھا۔ انہوں نے مسلم لیگ (ن) کو شدید تنقید کا نشانہ بناتے ہوئے کہا کہ ن لیگ کا مظفرآباد میں حکومت بنانے کا خواب کبھی پورا نہیں ہوگا۔

بلاول بھٹو زرداری نے وفاقی حکومت کو خبردار کرتے ہوئے کہا کہ اسلام آباد کی حکومت کی الٹی گنتی شروع ہو چکی ہے اور ‘بڑے بڑے لوگ’ خود مان رہے ہیں کہ نظام کلیپس کر چکا ہے۔ انہوں نے کہا کہ اس سیاسی بحران کی ذمہ دار مسلم لیگ (ن) کی اپنی اندرونی کشمکش اور ان کا ایک مخصوص دھڑا ہے جو اپنے ہی وزیراعظم کی کوششوں کو ناکام بنا رہا ہے۔ انہوں نے 10 اگست کے الیکشن کا ذکر کرتے ہوئے کارکنوں کو ہدایت کی کہ وہ اپنے ووٹ کا تحفظ کریں اور واضح کیا کہ اگر دھاندلی یا ناانصافی کی گئی تو وہ خود سڑکوں پر بیٹھ کر احتجاج کی قیادت کریں گے۔