امریکا پاکستان تعلقات میں پیش رفت کا سلسلہ جاری ہے، امریکی سفارتخانہ

اسلام آباد میں قائم امریکی سفارتخانے نے جاری کردہ ایک اہم بیان میں کہا ہے کہ پاک امریکہ تعلقات میں مسلسل پیش رفت کا سلسلہ جاری ہے اور صدر ڈونلڈ ٹرمپ کی انتظامیہ کی قیادت میں دونوں ممالک کے درمیان مختلف شعبوں میں دوطرفہ تعاون کو تیزی سے وسعت دی جا رہی ہے۔

سماجی رابطے کے پلیٹ فارم ایکس (ٹویٹر) پر اپنے بیان میں امریکی سفارتخانے نے بتایا کہ دوطرفہ تعاون کے نئے مواقع تلاش کرنے کے لیے امریکی اراکینِ کانگریس اور ممتاز کاروباری رہنماؤں نے اسلام آباد اور لاہور کے دورے کیے ہیں۔ بیان کے مطابق واشنگٹن میں منعقدہ “امریکہ پاکستان انسدادِ دہشت گردی مذاکرات” میں دونوں ممالک کے اعلیٰ حکام نے مشترکہ سکیورٹی ترجیحات پر تفصیلی تبادلہ خیال کیا۔

مزید برآں، امریکی ناظم الامور نیٹلی بیکر نے امریکہ کی 250 ویں سالگرہ اور دونوں ممالک کے مابین قائم کئی دہائیوں پر محیط دوستی کی مناسبت سے منعقدہ ایک خصوصی گالف ٹورنامنٹ میں بھی شرکت کی۔ سفارتخانے نے تبصرہ کرتے ہوئے کہا کہ مذاکراتی میز سے لے کر گالف کے میدان تک، امریکہ اور پاکستان کے درمیان بڑھتی ہوئی شراکت داری کے لحاظ سے یہ ایک انتہائی مصروف اور متحرک موسمِ گرما ثابت ہوا ہے۔